ஒலிம்பிக் போட்டிக்கு 36 ஆண்டுகளுக்குப் பிறகு தகுதி பெற்றுள்ள இந்திய மகளிர் ஹாக்கி அணி, ஞாயிற்றுக்கிழமை நடைபெறவுள்ள தனது முதல் ஆட்டத்தில் ஜப்பானை எதிர்கொள்கிறது.
முன்னதாக, கடந்த ஆண்டு ஜூன் மாதம் உலக ஹாக்கி லீக் அரையிறுதியில் ஜப்பானை வீழ்த்தியதன் மூலம் 5-ஆவது இடத்தைப் பிடித்த இந்திய அணி, ரியோ ஒலிம்பிக்கிற்கும் தகுதி பெற்றது குறிப்பிடத்தக்கது.
தரவரிசையில் இந்திய மகளிர் ஹாக்கி அணி 13-ஆவது இடத்திலும், ஜப்பான் அணி 10-ஆவது இடத்திலும் உள்ளன. இதற்கு முன்னர் 1980-ஆம் ஆண்டு மாஸ்கோ ஒலிம்பிக்கில் பங்கேற்ற இந்திய மகளிர் ஹாக்கி அணி, அதில் 4-ஆவது இடத்தை பிடித்தது.