நம் பிம்பத்தை பிரதிபலிக்கும் கண்ணாடி உடைந்து விட்டால், கெட்டது நடக்கும் என்று கண்ணாடியை அடிப்படையாக கொண்டு ஏராளமான நம்பிக்கைகள் மக்களிடம் நிலவி வருகிறது.
பிறந்த குழந்தை கண்ணாடியை பார்க்க கூடாது ஏன்?
குழந்தைகள் பிறந்ததிலிருந்து ஒரு வருட காலத்திற்கு கண்ணாடி பார்க்க கூடாது என்று நம் முன்னோர்கள் கூறி வைத்தது, அவர்களின் பாதுகாப்பை கருத்தில் கொண்டு தான்.
எப்படியெனில், குழந்தைகள் பிறந்து அந்த ஒரு வருடம் தவழ்வது, குப்புற விழுவது, முட்டி போடுவது என ஒவ்வொன்றாக கற்று கொள்ளும் கால கட்டத்தில் அவர்களின் கையில் கண்ணாடி கிடைத்தால், அது கீழே விழுந்து உடைந்து குழந்தைக்கு ஆபத்தை ஏற்படுத்தும் என்பதற்காக கூறப்பட்டது.
கண்ணாடி பற்றிய மூட நம்பிக்கைகள்?
- தன் வருங்கால கணவன் யாரென்று தெரிந்துக் கொள்ள ஒரு பெண் ஆப்பிளை மென்றவாறு கூந்தலை வாரிய படி கண்ணாடியை பார்த்தால் அவளின் வருங்கால கணவனின் முகம் அவள் தோளுக்கு பின்னால் நிற்பது போல கண்ணாடியில் தெரியுமாம்.
- ஆப்பிளின் தோலை வாயால் உரித்து எடுக்கும் போது, அது கீழே விழுந்து ஒரு கண்ணாடி மூலமாக அதை பார்த்தால், அது எதேச்சையாக ஏதோ ஒரு எழுத்து வடிவத்தை ஒத்திருக்குமாம். அது வருங்கால கணவன் பெயரின் முதல் எழுத்து என நம்பப்படுகிறது.
- வீட்டின் வாசலில் கண்ணாடியை மாட்டி வைக்கக் கூடாது. ஆனால் வீட்டு வாசலில் கண்ணாடியை வைத்தால், அது கெட்ட ஆவிகளான பேய், பிசாசுகள் போன்ற கெட்ட சக்திகளை வீட்டிற்குள் வராமல் திசை திருப்ப வைக்கப்படுவதாக ஒரு நம்பிக்கை சீனர்களிடம் இருந்து வருகிறது.
அம்மை நோய் உள்ளவர்கள் கண்ணாடி பார்க்க கூடாது ஏன்?
அம்மை நோய் தாக்கியிருக்கும் போது கண்ணாடி பார்க்க கூடாது என்று கூறுவார்கள். ஏனெனில் அம்மை நோயின் போது கண்ணாடியை பார்த்தால் நம் முகத்தில் உள்ள கொப்புளங்களை கைகளினால் கிள்ள தோன்றும், அதனால் அந்த நோயின் தீவிரம் கொடுரமாக அதிகரிக்கும்.
வீட்டில் வைக்கும் கண்ணாடிக்கு சாஸ்திரம் கூறுவது ஏன்?
வீட்டின் சில இடங்களில் கண்ணாடி வைக்கலாம். சில இடங்களில் வைக்க கூடாது என்ற சாஸ்திரம் கூறும் அனைத்திற்கு காரணம் என்னவெனில், வீட்டின் மூலைகள் பூமியின் காந்த திசைகளை வைத்து கட்டப்படிருப்பதாகவும், அதனால் உண்டாகும் ஈர்ப்பு சக்தி அதிர்வலைகளை உண்டாக்கி நல்ல கெட்ட சக்திகளை உருவாக்கும் என்று நம்பப்படுகிறது.
கண்ணாடியை எங்கு வைக்க கூடாது?
வீட்டில் ஒருவர் இறந்து விட்டால் அவர் இருந்த அறையில் இருக்கும் கண்ணாடியை, ஒரு துணிகளை கொண்டு மூடி வைக்க வேண்டும். இல்லையெனில் இறந்தவரின் ஆத்மா வெளியே செல்ல முடியாமல் கண்ணாடியின் பின்னால் மாட்டி கொள்ளும் என்ற நம்பிக்கை உள்ளது.
ஆனால் இந்த நம்பிக்கை பிம்பத்தின் பிரதிபலிப்பு எப்படி உருவாகுகின்றது என்பதன் அடிப்படை தெரியாமல் இருந்ததன் விளைவாக கண்ணாடிக்கு பின்னால் இன்னொரு உலகம் இருப்பது போன்ற ஒரு கற்பனை நம்பிக்கையாக உருவாகி இருக்கலாம்.