இந்திய கிரிக்கெட் அணி தலைவர் விராட் கோஹ்லி, சமீப காலமாக சாதனைகளை வாரிக் குவிக்கும் நாயகனாக திகழ்ந்து வருகிறார்.
அவுஸ்திரேலியாவிற்கு எதிராக இன்று நடைபெற்ற 2வது ஒருநாள் போட்டியில், விராட் கோஹ்லி தனது 39வது சதத்தை பூர்த்தி செய்துள்ளார்.
இதனை 210 இன்னிங்ஸில் கோஹ்லி அடித்துள்ளார். இது ஒருநாள் போட்டிகளில் சேஸிங் செய்யும் போது, விராட் கோஹ்லி அடித்த 24வது சதம் ஆகும். 39வது சதத்தை பூர்த்தி செய்ய, சச்சினுக்கு 350 இன்னிங்ஸ் தேவைப்பட்டது குறிப்பிடத்தக்கது.
கோஹ்லியின் சாதனைகளை நோக்கும் போது, ஜனவரி 15ஆம் திகதி மிகவும் பிடித்தமானது என்றே தோன்றுகிறது.
தற்போது தொடர்ந்து 3வது ஆண்டாக இதே நாளில் கோஹ்லி சதம் விளாசியுள்ளார். கடந்த 2017 ஜனவரி 15ல் ஒருநாள் சதம், 2018 ஜனவரி 15ல் டெஸ்ட் சதம், 2019 ஜனவரில் ஒருநாள் சதம் அடித்துள்ளார்.
சர்வதேச போட்டிகளில் அடித்த ஒட்டுமொத்த சதங்களின் பட்டியலில் கோஹ்லி 3வது இடத்தில் உள்ளார். சச்சின் 100 சதங்கள், ரிக்கி பாண்டிங் 71 சதங்கள், சங்காக்கரா 63 சதங்கள் அடித்துள்ளனர்.
வெளிநாடுகளில் அடிக்கப்பட்ட சதங்களின் பட்டியலில் 22 சதங்களுடன் கோஹ்லி 2வது இடத்தில் உள்ளார்.
முதலிடத்தில் 29 சதங்களுடன் சச்சின் இருக்கிறார். 3வது இடத்தில் ஜெயசூர்யா மற்றும் சங்காக்கரா ஆகியோர் 21 சதங்கள் அடித்துள்ளனர்.
இன்றைய போட்டியில் ஒருநாள் ஸ்கோரில் 11வது இடத்திற்கு முன்னேறி உள்ளார். இலங்கையைச் சேர்ந்த தில்ஷனின் 10,290 ஓட்டங்களைக் கடந்துள்ளார்.
இந்த ஓட்டங்களை குவிக்க தில்ஷனுக்கு 303 இன்னிங்ஸ் தேவைப்பட்டது. ஆனால் கோஹ்லி 210 இன்னிங்ஸில் எடுத்துள்ளார்.
விரைவில் டாப் 10 பேட்ஸ்மேன்களின் சாதனைகளை தகர்த்து எறிவார் என்று எதிர்பார்க்கப்படுகிறது.
10வது இடத்தில் 10,405 ஓட்டங்களுடன் பிரைன் லாரா உள்ளார். முதல் 10 இடங்களில் இருக்கும் துடுப்பாட்டக்காரர்கள் அனைவரும் தற்போது கிரிக்கெட்டில் இருந்து ஓய்வு பெற்று விட்டனர்.
கடந்த 2017ஆம் ஆண்டில் இருந்து விராட் கோஹ்லி அதிக சதங்களை அடித்துள்ளார். ரோஹித் ஷர்மா 2017ல் இருந்து 42 இன்னிங்ஸில் 12 சதங்களை அடித்திருந்தார்.
ஆனால் கோஹ்லி 42 இன்னிங்ஸில் 13 சதங்களை அடித்துள்ளார். 2வது விக்கெட் ஜோடியான கோஹ்லி மற்றும் ரோஹித் ஆகியோர் ஒருநாள் போட்டிகளில் 4117 ஓட்டங்கள் எடுத்துள்ளனர்.
முன்னதாக சச்சின், டிராவிட் இணைந்து 4117 ஓட்டங்கள் எடுத்திருந்தனர். இவர்களை விட, குறைந்த இன்னிங்ஸில் கோஹ்லி, ரோஹித் இணை சாதித்துள்ளது.