சச்சினின் உலக சாதனையை சமன் செய்த ரூட்

இங்கிலாந்து கிரிக்கெட் அணி சொந்த மண்ணில் அவுஸ்திரேலியாவுக்கு எதிரான 5 போட்டிகள் கொண்ட ஆஷஸ் டெஸ்ட் தொடரில் விளையாடி வருகிறது.

இந்த தொடரில் இதுவரை 4 ஆட்டங்கள் நிறைவடைந்த நிலையில் அவுஸ்திரேலிய அணி 2 போட்டியிலும், இங்கிலாந்து 1 போட்டியிலும், வெற்றி பெற்றுள்ளதோடு, ஒரு ஆட்டம் சமநிலையில் முடிந்தது.

இதையடுத்து இவ்விரு அணிகள் இடையிலான 5 ஆவது டெஸ்ட் போட்டி லண்டன் ஓவல் மைதானத்தில் கடந்த 27 ஆம் திகதி தொடங்கியது.

இந்த ஆட்டத்தில் முதலில் இங்கிலாந்து துடுப்பெடுத்து ஆடியது. அதன்படி இங்கிலாந்து அணி முதல் இன்னிங்ஸில் 283 ஓட்டங்களையும், அவுஸ்திரேலியா முதல் இன்னிங்ஸில் 295 ஓட்டங்களையும் எடுத்தன.

இதனால் 12 ஓட்டங்கள் பின்னிலையுடன் தனது 2 ஆவது இன்னிங்சை தொடங்கிய இங்கிலாந்து 29 ஆம் திகதி 3 ஆம் நாள் முடிவில் 9 விக்கெட்டை இழந்து 389 ஓட்டங்கள் குவித்துள்ளது. இதுவரை இங்கிலாந்து 377 ஓட்டங்கள் முன்னிலை பெற்றுள்ளது.

இந்நிலையில், இந்த போட்டியில் இங்கிலாந்து அணியின் முன்னணி துடுப்பாட்ட வீரர் ஜோ ரூட் முதல் இன்னிங்ஸில் 5 ஓட்டங்களும், 2 ஆவது இன்னிங்ஸில் 91 ஓட்டங்களும் எடுத்தார்.

அவர் இந்த தொடரில் 5 போட்டிகளில் விளையாடி 412 ஓட்டங்களை குவித்துள்ளார்.

இந்த ஓட்டங்கள் குவிப்பின் மூலம் இந்தியாவின் சச்சின் டெண்டுல்கரின் சாதனையை ஜோ ரூட் சமன் செய்துள்ளார்.

அதாவது, டெஸ்ட் தொடரில் அதிக முறை 300+ ஓட்டங்கள் குவித்த சச்சின் டெண்டுல்கரின் (19 முறை) சாதனையை அவர் சமன் செய்துள்ளார்.

இதற்கு அடுத்த இடங்களில் ராகுல் டிராவிட் (18 முறை), பிரையன் லாரா (18), ரிக்கி பாண்டிங் (17), அலெஸ்டர் குக் (17 முறை) என்பது குறிப்பிடதக்கதாகும்.